10 Imuseñong alagad ng sining, kinilala sa “SiningSinta: Likha ng Pusong Imuseño”

Sampung kaibig-ibig, makahulugan, at malikhaing obra ng mga Imuseño ang personal na pinarangalan ni Imus City Mayor Alex “AA” L. Advincula sa pagtatapos ng painting contest na “SiningSinta: Likha ng Pusong Imuseño” noong Marso 3, 2025, sa New Imus City Government Center.

Sa ginanap na paggawad, kinilala ang sining ni Edwin Lardillo na “Proud Imuseño” bilang first place winner. Sinundan ito nina Miguelito Maaba at Nicho Laspoña sa kanilang mga likhang “Tatak Imuseño” at “Imus History.”

Kabilang din sa mga finalist ang obrang “Panata” ni Rae Niño Pelagia, “Nana Pilar” ni Rodolfo Vera Cruz Jr., “Nasa mabuting kamay ang aking kinabukasan” ni Mark Anthony Paez, “Likhang Imuseño” ni Cesar Cajigas, “Bridge of Isabel II” ni Christopher Niar, “Kasaysayan ng Katedral ng Imus” ni Joerene Castillo, at “Kabigha-bighaning Imus” ni Mary Eunice Ramos.

Binigyang-pagbati rin sila nina Imus City Vice Mayor Homer “Saki” T. Saquilayan, Konsehal Enzo Asistio, Konsehal Igi Revilla – Ocampo, Konsehal Atty. Wency Lara, Konsehal Dennis Lacson, Konsehal Yen Saquilayan, Konsehal Larry Boy Nato, Konsehal Mark Villanueva, Konsehal Sherwin Lares – Comia, Konsehal Totie Ropeta, Konsehal Darwin Remulla, Sangguniang Kabataan Federation President Glian Ilagan, dating konsehal Tito Monzon, at dating Liga ng mga Barangay President AJ Sapitan Jr.

Mula sa 101 obra, nakatuwang ni Mayor AA ang mga batikang alagad ng sining na sina Zyrene Vanconcha, Dexter Cinco, at Zarina Adorador sa masusing pagpili ng 10 pinakamahuhusay na sining.

Nasilayan din ang mga naggagandahang likha sa lobby ng New Imus City Government Center hanggang noong Marso 7.

Ang “SiningSinta: Likha ng Pusong Imuseño” ay bahagi ng mga pagdiriwang ng sining at pag-ibig sa Imus sa nagdaang Buwan ng mga Sining tuwing Pebrero, alinsunod sa Proklamasyon Blg. 683, taong 1991.