Bagong pabahay sa Imus, sinimulan na

Ginanap ang groundbreaking ceremony ng itatayong mid-rise condominium housing project sa Imus nitong Mayo 28, 2024, malapit sa New Imus City Government Center sa pangunguna nina City Mayor Alex “AA” L. Advincula, Vice Mayor Homer “Saki” T. Saquilayan, at Congressman Adrian Jay “AJ” C. Advincula, kasama sina Department of Human Settlements and Urban Development Secretary Jose Rizalino Acuzar, Megawide Construction Corporation CEO at PH1 World Developers (PH1WD) Chairman at CEO Edgar Saavedra, at PH1WD President Gigi Alcantara.

Ayon kay Mayor AA, ang pag-uumpisa ng naturang housing project ay ang katuparan sa hiling ng kaniyang administrasyon at ng mga Imuseñong magkaroon ng maayos na tahanan.

“Ito na po yung katuparan, ito na po yung hinihiling natin… [P]inangako natin sa ating mga kababayang mahihirap na magkakaroon sila ng marangal, maayos, at ligtas na pamayanan. At dito mismo sa site na ‘to, itatayo ang kanilang pangarap sa kanilang magandang pamilya.”

Sa ilalim ng programang Pambansang Pabahay Para sa Pilipino Housing (4PH) ng pamahalaan tinatayang nasa 1,100 pamilya ang kayang mabigyan ng bagong bahay na itatayo sa 1.3 ektaryang lupain.