2nd Congressman AJ Cup Inter-mother Barangay Basketball Tournament, nagsimula na

Pormal nang binuksan ni Congressman Adrian Jay “AJ” C. Advincula ang Second Congressman AJ Cup Inter-Mother Barangay Basketball Tournament nitong Mayo 25, 2024, sa City of Imus Sports Complex, kung saan maglalaban-laban ang 20 koponan mula sa iba’t ibang barangay sa lungsod.

Kaagapay rito ang Kings of the Court, Imus City Sports Development Unit, at ang buong Pamahalaang Lungsod ng Imus na pinangungunahan ni City Mayor Alex “AA” L. Advincula. Sa kaniyang pagbati, pinaalalahanan ni Cong. AJ ang mga manlalaro na huwag magkasakitan dahil isa itong friendly basketball tournament.

“Alam kong pisikal ang basketball pero ayaw kong nagkakasakitan kayo. Ingatan natin ang ating mga kakampi, at ingatan din natin ang ating mga kalaban,” pahayag ng kongresista.

Inilahad din ni Cong. AJ na doble ang premyong matatanggap ng mga magwawaging koponan kumpara noong kauna-unahang AJ Cup Basketball Tournament. Makatatanggap ng P200,000 ang hihiranging kampeon, P175,000 ang makasusungkit sa ikalawang puwesto, at P100,000 ang makapapasok sa ikatlong puwesto.

Bago ang opisyal na pagsisimula, nagpaligsahan ang mga muse ng mga koponan. Tagumpay ang Palico na makuha ang titulong Best Muse at ang cash prize na P10,000.

Buena mano ring nanalo ang Palico sa puntos na 87-72 kontra Poblacion para sa first game, habang wagi ang Malagasang 1 st sa puntos na 70-63 laban sa Buhay na Tubig para sa second game.

Saksi rin sa pagsisimula ng nasabing liga sina Vice Mayor Homer “Saki” T. Saquilayan at mga konsehal.

Ito na ang ikalawang taon ng Congressman AJ Cup Inter-Mother Barangay Basketball Tournament.